అందరి టీవీ డిజిటల్ న్యూస్ నర్సంపేట: ప్రభుత్వ ఉన్నత పాఠశాల నర్సంపేటలో ముందస్తు బతుకమ్మ వేడుకలను ఘనంగా నిర్వహించారు. తెలంగాణ సంస్కృతి, సంప్రదాయాలకు ప్రతీకగా నిలిచే బతుకమ్మ పండుగను పురస్కరించుకుని పాఠశాల విద్యార్థినులు రంగురంగుల పూలతో అందమైన బతుకమ్మలను తయారు చేసి వేడుకల్లో పాల్గొన్నారు.బతుకమ్మ పాటలకు అనుగుణంగా విద్యార్థినులు లయబద్ధంగా నృత్యాలు చేస్తూ సందడి చేశారు. మహిళా ఉపాధ్యాయులు, విద్యార్థినులు ఉత్సాహంగా పాల్గొనడంతో పాఠశాల ప్రాంగణం పండుగ వాతావరణాన్ని సంతరించుకుంది. పూల బతుకమ్మల అందాలు, పాటలు, నృత్యాలతో వేడుకలు ఉత్సాహభరితంగా సాగాయి.
ఈ సందర్భంగా పాఠశాల ప్రధానోపాధ్యాయులు విద్యార్థినీ విద్యార్థులకు, ఉపాధ్యాయులకు దసరా మరియు బతుకమ్మ పండుగ శుభాకాంక్షలు తెలియజేశారు. పండుగల ప్రాముఖ్యతను, తెలంగాణ సంస్కృతి సంప్రదాయాలను విద్యార్థులు తెలుసుకోవాలని సూచించారు. దసరా సెలవులను విద్యార్థులందరూ సురక్షితంగా, ఆనందంగా కుటుంబ సభ్యులతో కలిసి జరుపుకోవాలని కోరారు.
అలాగే పాఠశాలకు అక్టోబర్ 10వ తేదీ నుంచి అక్టోబర్ 22వ తేదీ వరకు దసరా సెలవులు ఉంటాయని, అక్టోబర్ 23వ తేదీన పాఠశాల తిరిగి పునఃప్రారంభమవుతుందని ప్రధానోపాధ్యాయులు తెలిపారు.
ముందస్తు బతుకమ్మ వేడుకలతో పాఠశాలలో పండుగ సందడి నెలకొంది. విద్యార్థుల్లో తెలంగాణ సంస్కృతి, సంప్రదాయాల పట్ల అవగాహన పెంపొందించేందుకు ఇటువంటి కార్యక్రమాలు దోహదపడతాయని ఉపాధ్యాయులు పేర్కొన్నారు.
