అందరి టీవీ డిజిటల్ న్యూస్మైనర్ బాలికపై అఘాయిత్యం.. నిందితుడి అరెస్ట్
మట్వాడ పోలీస్ స్టేషన్ పరిధిలో ఘటన.. 15 రోజుల జుడీషియల్ రిమాండ్....
మట్వాడ పోలీస్ స్టేషన్ పరిధిలో మైనర్ బాలికపై పలుమార్లు లైంగిక దాడికి పాల్పడి, ఆమె గర్భం దాల్చడానికి కారణమైన నిందితుడిని పోలీసులు అరెస్ట్ చేసి రిమాండ్కు తరలించారు. బాధితురాలి గోప్యత, భద్రతను దృష్టిలో ఉంచుకుని ఆమెకు సంబంధించిన వ్యక్తిగత వివరాలు, కుటుంబ వివరాలు మరియు నివాస ప్రాంతాన్ని పోలీసులు గోప్యంగా ఉంచారు.
పోలీసుల వివరాల ప్రకారం.. బాధితురాలి తల్లి ప్రైవేట్ రంగంలో స్వీపర్గా పనిచేస్తోంది. కుటుంబ పరిస్థితుల నేపథ్యంలో తన ముగ్గురు కుమార్తెలతో కలిసి ఆమె నివసిస్తోంది. సుమారు మూడేళ్ల క్రితం బాధితురాలిని బాలికల వసతి గృహంలో చేర్పించారు.
అయితే 2025 జూన్లో నిందితుడు సంగాల విజయ్ కుమార్ (38) బాలిక ఉంటున్న వసతి గృహానికి వెళ్లి, ఆమెకు తినుబండారాలు కొనిచ్చి బైక్పై తన గదికి తీసుకువచ్చినట్లు పోలీసులు తెలిపారు. అక్కడ బాలికపై లైంగిక దాడికి పాల్పడి, ఈ విషయం ఎవరికైనా చెబితే కుటుంబ సభ్యులను చంపేస్తానని బెదిరించినట్లు వెల్లడించారు. భయంతో బాలిక ఈ విషయాన్ని ఎవరికీ చెప్పలేకపోయిందని పోలీసులు తెలిపారు.
ఆ తర్వాత కూడా నిందితుడు పలుమార్లు బాలికను వసతి గృహం నుంచి తీసుకువచ్చి లైంగిక దాడికి పాల్పడినట్లు కేసు దర్యాప్తులో వెల్లడైంది.
అనారోగ్యంతో ఘటన వెలుగులోకి..
ఇటీవల బాలిక అనారోగ్యానికి గురై కడుపు నొప్పితో బాధపడుతుండటాన్ని గమనించిన తల్లి ఆరా తీయగా అసలు విషయం వెలుగులోకి వచ్చింది. బాలిక తనపై జరిగిన అకృత్యాన్ని తల్లికి వివరించింది. వైద్య పరీక్షలు నిర్వహించగా బాలిక గర్భం దాల్చినట్లు నిర్ధారణ కావడంతో తల్లి పోలీసులకు ఫిర్యాదు చేసింది.
ఫిర్యాదు మేరకు మట్వాడ పోలీసులు కేసు నమోదు చేసి దర్యాప్తు చేపట్టారు. భరోసా కేంద్రం ద్వారా బాధితురాలి వాంగ్మూలాన్ని వీడియో రికార్డింగ్లో నమోదు చేసి, వైద్య పరీక్షల కోసం ప్రభుత్వ ఆసుపత్రికి తరలించారు.
నిందితుడి అరెస్ట్..
వాహన తనిఖీలు నిర్వహిస్తున్న సమయంలో పోలీసులను గమనించిన నిందితుడు పారిపోయేందుకు ప్రయత్నించగా పోలీసులు చాకచక్యంగా అదుపులోకి తీసుకున్నారు. విచారణలో నిందితుడు నేరాన్ని అంగీకరించినట్లు పోలీసులు తెలిపారు. నేరానికి ఉపయోగించిన పల్సర్ మోటార్సైకిల్ను స్వాధీనం చేసుకున్నారు.
నిందితుడిపై **BNS సెక్షన్లు 65(1), 64(2)(m), 64(2)(f), 351(2)**తో పాటు POCSO చట్టం-2012లోని సెక్షన్లు 5(l), 5(n) r/w 6 కింద కేసు నమోదు చేశారు. వైద్య పరీక్షల అనంతరం నిందితుడిని న్యాయస్థానం ముందు హాజరుపరచగా, 15 రోజుల జుడీషియల్ రిమాండ్ విధించినట్లు పోలీసులు తెలిపారు.
