ANDARI TV DIGITAL
తెలంగాణ ఉద్యమంలో ప్రముఖ నాయకుడిగా గుర్తింపు పొందిన బీఆర్ఎస్ మాజీ ఎమ్మెల్యే పెద్ది సుదర్శన్ రెడ్డి ఇకలేరు. ఐదు రోజులుగా అనారోగ్యంతో హైదరాబాద్లోని సికింద్రాబాద్ యశోద ఆసుపత్రిలో చికిత్స పొందుతున్న ఆయన ఆరోగ్య పరిస్థితి విషమించడంతో అర్ధరాత్రి 12 గంటల 51 నిమిషాలకు మృతి చెందినట్లు వైద్యులు అధికారికంగా ప్రకటించారు.
పెద్ది సుదర్శన్ రెడ్డి మృతితో ఆయన అభిమానులు, పార్టీ కార్యకర్తలు, బంధువులు, శ్రేయోభిలాషులు తీవ్ర విషాదంలో మునిగిపోయారు. యశోద ఆసుపత్రి వద్ద పెద్ద సంఖ్యలో అభిమానులు చేరుకుని నివాళులర్పిస్తున్నారు.
నల్లబెల్లి మండలానికి చెందిన పెద్ది సుదర్శన్ రెడ్డి విద్యార్థి దశ నుంచే రాజకీయాల్లో చురుకుగా పాల్గొన్నారు. కాంగ్రెస్ అనుబంధ విద్యార్థి విభాగం ఎన్ఎస్యూఐలో తన రాజకీయ ప్రస్థానాన్ని ప్రారంభించిన ఆయన, అనంతరం కాంగ్రెస్ యువజన విభాగంలో పలు బాధ్యతలు నిర్వహించారు.
2001లో తెలంగాణ రాష్ట్ర సమితి ఆవిర్భావం సమయంలోనే పార్టీలో చేరి తెలంగాణ ఉద్యమంలో కీలక పాత్ర పోషించారు. ఉమ్మడి వరంగల్ జిల్లా కన్వీనర్, జిల్లా అధ్యక్షుడు, పొలిట్బ్యూరో సభ్యుడిగా పార్టీ బలోపేతానికి విశేషంగా కృషి చేశారు. తెలంగాణ ఉద్యమ సమయంలో నిర్వహించిన అనేక సభలు, కార్యక్రమాల్లో ముందుండి ఉద్యమాన్ని నడిపించారు.
2018 అసెంబ్లీ ఎన్నికల్లో నర్సంపేట నియోజకవర్గం నుంచి ఎమ్మెల్యేగా విజయం సాధించి ప్రజాప్రతినిధిగా సేవలందించారు. అనంతరం శాసనసభ పబ్లిక్ అకౌంట్స్ కమిటీ సభ్యుడిగా, తెలంగాణ రాష్ట్ర సివిల్ సప్లైస్ కార్పొరేషన్ ఛైర్మన్గా కూడా బాధ్యతలు నిర్వహించారు.
ఆయన మరణంపై పలువురు రాజకీయ నాయకులు, ప్రజాప్రతినిధులు, అభిమానులు సంతాపం వ్యక్తం చేస్తున్నారు. తెలంగాణ ఉద్యమంలో ఆయన చేసిన సేవలను స్మరించుకుంటూ నివాళులర్పిస్తున్నారు.
ఇది ANDARI TV DIGITAL – Political Desk.
"ప్రజల కోసం... ప్రజలతో... ప్రజల గొంతుక."
మరిన్ని తాజా రాజకీయ వార్తల కోసం ANDARI TV DIGITAL ను Subscribe చేయండి.
