రూ.2 కోట్లతో నిర్మించిన భవనాన్ని ప్రారంభించిన ఎమ్మెల్యే దొంతి మాధవరెడ్డి, కలెక్టర్ సత్య శారద.

Date: 2026-10-25

అందరి టీవీ డిజిటల్ న్యూస్:నర్సంపేట: నర్సంపేట పట్టణంలో గిరిజన బాలికల కోసం నూతనంగా నిర్మించిన వసతి గృహాన్ని నర్సంపేట ఎమ్మెల్యే దొంతి మాధవరెడ్డి, జిల్లా కలెక్టర్ సత్య శారదతో కలిసి ఆదివారం ఘనంగా ప్రారంభించారు.

విద్యార్థినులకు మెరుగైన వసతి సౌకర్యాలు

ఈ సందర్భంగా ఎమ్మెల్యే దొంతి మాధవరెడ్డి మాట్లాడుతూ, నర్సంపేట పట్టణంలోని గిరిజన సంక్షేమ వసతి గృహంలో విద్యార్థినుల సంఖ్యకు అనుగుణంగా గదులు సరిపోకపోవడాన్ని గుర్తించి, వారి సౌకర్యార్థం రూ.2 కోట్ల వ్యయంతో నూతన వసతి గృహాన్ని నిర్మించినట్లు తెలిపారు.

ప్రస్తుతం ఈ వసతి గృహంలో సుమారు 300 మంది విద్యార్థినులు విద్యనభ్యసిస్తున్నారని పేర్కొన్నారు. విద్యార్థినులకు మెరుగైన వసతి సౌకర్యాలు కల్పించాలనే లక్ష్యంతో నూతన భవనాన్ని నిర్మించినట్లు వివరించారు.

నూతన వసతి గృహం అందుబాటులోకి రావడంతో విద్యార్థినులకు సౌకర్యవంతమైన వసతి లభించడంతో పాటు, ప్రశాంతమైన వాతావరణంలో చదువుకునేందుకు అవకాశం కలుగుతుందని అన్నారు. విద్యార్థినుల విద్యాభివృద్ధికి అవసరమైన సౌకర్యాలు కల్పించడం ప్రభుత్వ ప్రాధాన్యత అని పేర్కొన్నారు.

కార్యక్రమంలో పాల్గొన్న ప్రముఖులు

ఈ కార్యక్రమంలో నర్సంపేట మున్సిపల్ చైర్‌పర్సన్ పెండెం శ్రీలక్ష్మి రామానంద్, మార్కెట్ కమిటీ చైర్మన్లు పాలాయి శ్రీనివాస్, రావుల హరీష్ రెడ్డి, మున్సిపాలిటీ వైస్ చైర్మన్ గంధం నరేందర్, కౌన్సిలర్లు, పార్టీ ముఖ్య నాయకులు, సంబంధిత అధికారులు, గిరిజన సంక్షేమ శాఖ అధికారులు, తదితరులు పాల్గొన్నారు.