అందరి టీవి డిజిటల్ న్యూస్ నర్సంపేట: నర్సంపేట ప్రభుత్వ మెడికల్ కాలేజీకి స్వర్గీయ పెద్ది సుదర్శన్ రెడ్డి పేరు పెట్టాలని బీఆర్ఎస్ పట్టణ అధ్యక్షుడు నాగెల్లి వెంకట నారాయణ డిమాండ్ చేశారు. ఈరోజు ఏర్పాటు చేసిన విలేకరుల సమావేశంలో ఆయన మాట్లాడుతూ, తమకు కాంస్య విగ్రహాలపై ఎలాంటి వ్యామోహం లేదని, పెద్ది సుదర్శన్ రెడ్డి సేవలకు నిజమైన నివాళి ఇవ్వాలంటే ఆయన పేరును ప్రభుత్వ మెడికల్ కాలేజీకి పెట్టాలని అన్నారు.
విగ్రహ రాజకీయాలు చేయడం కంటే, అధికారంలో ఉన్న కాంగ్రెస్ ప్రభుత్వం చిత్తశుద్ధితో నిర్ణయం తీసుకుని “పెద్ది సుదర్శన్ రెడ్డి ప్రభుత్వ మెడికల్ కాలేజీ, నర్సంపేట” పేరుతో వెంటనే జీవో విడుదల చేయాలని వెంకట నారాయణ డిమాండ్ చేశారు.
విగ్రహం తొలగింపుపై ప్రజల్లో వ్యతిరేకత వ్యక్తమవుతున్న నేపథ్యంలోనే కాంగ్రెస్ నాయకులు ఇప్పుడు విగ్రహాన్ని తామే ఏర్పాటు చేస్తామని చెబుతున్నారని ఆయన విమర్శించారు. ఒకవైపు విగ్రహాన్ని తొలగించాలని ఫిర్యాదులు చేయడం, మరోవైపు కాంగ్రెస్ పార్టీకి, ఎమ్మెల్యేకు సంబంధం లేదని చెప్పడం ద్వంద్వ వైఖరికి నిదర్శనమని ఆరోపించారు.
పెద్ది సుదర్శన్ రెడ్డి విగ్రహాన్ని మెడికల్ కాలేజీ సమీపం నుంచి తొలగించాలని 5వ వార్డు కాంగ్రెస్ కౌన్సిలర్ భర్త పొన్నాల ప్రకాష్ మున్సిపల్ కమిషనర్కు రాతపూర్వకంగా ఫిర్యాదు చేశారని, ఆ ఫిర్యాదు ఆధారంగానే కమిషనర్ పోలీసులకు లేఖ రాశారని వెంకట నారాయణ పేర్కొన్నారు. దీనికి సంబంధించిన లేఖ తమ వద్ద ఉందని తెలిపారు.
అధికారంలో ఉన్నది కాంగ్రెస్ ప్రభుత్వమేనని, మెడికల్ కాలేజీకి పేరు పెట్టే అధికారం కూడా ప్రభుత్వానికే ఉందని ఆయన అన్నారు. నిజంగా పెద్ది సుదర్శన్ రెడ్డిపై గౌరవం ఉంటే వెంటనే పేరు పెట్టే ప్రక్రియను ప్రారంభించాలని డిమాండ్ చేశారు.
నర్సంపేటలో భారీగా పోలీసు బందోబస్తు ఏర్పాటు చేయడం, బీఆర్ఎస్ నాయకులు, కార్యకర్తలు, ఉద్యమకారులు, అభిమానులను హౌస్ అరెస్టులు చేయడం వంటి చర్యలపై కూడా ఆయన ప్రశ్నలు సంధించారు. ఈ అంశాలపై స్థానిక ఎమ్మెల్యే దొంతి మాధవరెడ్డి, రాష్ట్ర ప్రభుత్వం ఎందుకు స్పందించలేదని ప్రశ్నించారు.
అధికారులే ఎమ్మెల్యే కార్యాలయం నుంచి విగ్రహం తొలగించాలని ఒత్తిడి ఉందని చెప్పినట్లు వెంకట నారాయణ ఆరోపించారు. అయితే ఈ ఆరోపణలపై సంబంధిత అధికారులు లేదా కాంగ్రెస్ నాయకుల అధికారిక వివరణ వెలువడాల్సి ఉందన్నారు.
ఎమ్మెల్యే దొంతి మాధవరెడ్డి పుట్టినరోజు సందర్భంగా విగ్రహం తొలగింపు జరిగిందని, అదే సమయంలో బీఆర్ఎస్ నాయకులు, కార్యకర్తలను పోలీసు నిర్బంధంలో ఉంచారని ఆయన ఆరోపించారు. ప్రజలకు వాస్తవాలు తెలియజేస్తున్న తమ నాయకత్వాన్ని బెదిరించడం ప్రజాస్వామ్యానికి విరుద్ధమని అన్నారు.
“విగ్రహం తొలగించే రాజకీయాలు మానుకుని, పెద్ది సుదర్శన్ రెడ్డి పేరును చిరస్థాయిగా నిలబెట్టే నిర్ణయం తీసుకోవాలి. చిత్తశుద్ధి ఉంటే వెంటనే మెడికల్ కాలేజీకి ఆయన పేరు పెట్టేందుకు జీవో విడుదల చేయాలి” అని వెంకట నారాయణ డిమాండ్ చేశారు.
ఈ సమావేశంలో BRTU జిల్లా అధ్యక్షుడు గోనె యువరాజు, కౌన్సిలర్లు రాయిడి కీర్తి దుశాంత్ రెడ్డి, మండల శ్రీదేవి శ్రీనివాస్, శివరాత్రి స్వామి, దోమ్మటి రమ్య సంతోష్, మహిళా విభాగం పట్టణ అధ్యక్షురాలు వాసం కరుణ, మాజీ కౌన్సిలర్ నాగిశెట్టి ప్రసాద్, బండి ప్రవీణ్, పెండం వెంకటేశ్వర్లు, తాళ్లపల్లి రాంప్రసాద్, నాయిని వేణుచంద్, సంపంగి సాలయ్య, మంద ప్రసాద్, పైసా ప్రవీణ్, బైరి నాగరాజు, మోతే తిరుపతి రెడ్డి, బీరం నాగిరెడ్డి, బొల్లెపెళ్లి కమల్, పల్నాటి సందీప్, వాసం నాగరాజు, సుందరగిరి క్రాంతి తదితరులు పాల్గొన్నారు.
