అందరి టీవీ డిజిటల్ న్యూస్ నర్సంపేట: వరంగల్ జిల్లా నర్సంపేట పట్టణంలోని విజ్డమ్ హైస్కూల్లో 80వ స్వాతంత్ర్య దినోత్సవ వేడుకలను పాఠశాల కరస్పాండెంట్లు జావేద్, జహంగీర్, ప్రిన్సిపాల్, ఉపాధ్యాయులు, విద్యార్థుల సమక్షంలో ఘనంగా నిర్వహించారు. జాతీయ పతాకాన్ని ఆవిష్కరించి, జాతీయ గీతాలాపనతో కార్యక్రమాలను ప్రారంభించారు.ఈ సందర్భంగా పాఠశాల విద్యార్థులు దేశభక్తిని చాటే ప్రత్యేక సాంస్కృతిక కార్యక్రమాలను ప్రదర్శించారు. దేశ స్వాతంత్ర్య సమరయోధుల త్యాగాలు, దేశభక్తి, జాతీయ సమైక్యతను ప్రతిబింబించేలా విద్యార్థుల నృత్యాలు, పాటలు, వివిధ సాంస్కృతిక ప్రదర్శనలు ఆకట్టుకున్నాయి. విద్యార్థుల ప్రతిభను చూసి తల్లిదండ్రులు, ఉపాధ్యాయులు, పాఠశాల సిబ్బంది అభినందించారు.
అలాగే పాఠశాల NCC విద్యార్థులు నిర్వహించిన ప్రత్యేక విన్యాసాలు వేడుకలకు ప్రత్యేక ఆకర్షణగా నిలిచాయి. క్రమశిక్షణతో కూడిన NCC ప్రదర్శనలను విద్యార్థులు, తల్లిదండ్రులు, ఉపాధ్యాయులు ఆసక్తిగా తిలకించారు. దేశ సేవ, క్రమశిక్షణ, బాధ్యత వంటి విలువలను విద్యార్థుల్లో పెంపొందించడంలో NCC కార్యక్రమాలు కీలకమని నిర్వాహకులు పేర్కొన్నారు.
ఈ సందర్భంగా పాఠశాల కరస్పాండెంట్లు జావేద్, జహంగీర్, ప్రిన్సిపాల్ మాట్లాడుతూ.. దేశవ్యాప్తంగా 80వ స్వాతంత్ర్య దినోత్సవ వేడుకలను ఘనంగా జరుపుకుంటున్న సందర్భంగా దేశ ప్రజలకు, విద్యార్థులకు స్వాతంత్ర్య దినోత్సవ శుభాకాంక్షలు తెలిపారు. స్వాతంత్ర్య సమరయోధుల త్యాగాలను ప్రతి ఒక్కరూ స్మరించుకోవాలని, దేశ అభివృద్ధిలో యువత కీలక పాత్ర పోషించాలని అన్నారు.
విద్యార్థులు చిన్ననాటి నుంచే దేశభక్తి, క్రమశిక్షణ, సమాజం పట్ల బాధ్యత వంటి మంచి విలువలను అలవర్చుకోవాలని సూచించారు. విద్యార్థులు విద్యలో రాణించడంతో పాటు దేశానికి ఉపయోగపడే ఉత్తమ పౌరులుగా ఎదగాలని ఆకాంక్షించారు.
విజ్డమ్ హైస్కూల్లో నిర్వహించిన స్వాతంత్ర్య దినోత్సవ వేడుకలు జాతీయ భావాన్ని, విద్యార్థుల ప్రతిభను ప్రతిబింబించేలా ఉత్సాహభరితంగా సాగాయి. చివరగా సాంస్కృతిక కార్యక్రమాల్లో పాల్గొన్న విద్యార్థులను పాఠశాల యాజమాన్యం అభినందించింది.
