మహిళా లెక్చరర్ అవమానించిందనే మనస్తాపంతో ఆత్మహత్యకు పాల్పడిన విషాద ఘటన... అందరి టీవీ డిజిటల్ న్యూస్ వెబ్ డెస్క్:గద్వాల:
434 మార్కులు సాధించి జిల్లాలో రెండో స్థానం దక్కించుకున్న ఓ విద్యార్థిని.. మహిళా లెక్చరర్ అవమానించిందనే మనస్తాపంతో ఆత్మహత్యకు పాల్పడిన ఘటన గద్వాలలో తీవ్ర విషాదాన్ని నింపింది.
గద్వాల ప్రభుత్వ కళాశాలలో ఇంటర్ సెకండ్ ఇయర్ చదువుతున్న కొత్తపల్లి గ్రామానికి చెందిన నేతిబొట్టు తరుణ్ (17).. ఇంటర్ ఫస్ట్ ఇయర్ ఫలితాల్లో 434 మార్కులు సాధించి జిల్లాలో రెండో స్థానంలో నిలిచినట్లు సమాచారం. అయితే కాలేజీలో 435 మార్కులు సాధించిన మరో విద్యార్థితో పోలుస్తూ ఓ మహిళా లెక్చరర్ తనను కించపరిచినట్లు తరుణ్ తన సూసైడ్ నోట్లో పేర్కొన్నట్లు తెలుస్తోంది.
తనను అలా అవమానించడం సరికాదని లెక్చరర్ను తరుణ్ కోరగా.. "నువ్వేమైనా మంత్రి కొడుకువా? అంతకంటే గొప్పోడివా?" అంటూ తనను అవమానించడంతో పాటు చెంపపై కొట్టినట్లు ఆరోపణలు ఉన్నాయి. ఈ ఘటనతో క్లాస్లోని విద్యార్థులు నవ్వడంతో తీవ్ర మనస్తాపానికి గురైన తరుణ్.. ఈ విషయాన్ని తన సూసైడ్ నోట్లో ప్రస్తావించినట్లు సమాచారం.
మంగళవారం ఇంట్లో ఎవరూ లేని సమయంలో సూసైడ్ నోట్ రాసి.. మనస్తాపంతో ఉరివేసుకుని ఆత్మహత్యకు పాల్పడినట్లు కుటుంబ సభ్యులు తెలిపారు.
"ఉపాధ్యాయులు విద్యార్థులను ప్రోత్సహించే విధంగా ఉండాలి కానీ అవమానించకూడదు. సున్నిత మనస్కుడైన విద్యార్థిని అవమానిస్తే అతడు ఎంత బాధపడతాడో అర్థం చేసుకోవాలి" అని తరుణ్ తన సూసైడ్ నోట్లో పేర్కొన్నట్లు సమాచారం. తనను అవమానించిన లెక్చరర్పై చర్యలు తీసుకోవాలని, ఈ విషయం ప్రజలందరికీ తెలియాలనే ఉద్దేశంతోనే తాను ఇలా చేస్తున్నానని కూడా నోట్లో పేర్కొన్నట్లు తెలుస్తోంది.
ఈ ఘటనపై పోలీసులు దర్యాప్తు చేపట్టినట్లు సమాచారం. విద్యార్థి మృతికి కారణమైన పరిస్థితులపై పూర్తిస్థాయి విచారణ జరిపి బాధ్యులపై చర్యలు తీసుకోవాలని కుటుంబ సభ్యులు, విద్యార్థి సంఘాలు డిమాండ్ చేస్తున్నాయి.
గమనిక: ఈ ఘటనకు సంబంధించిన ఆరోపణలు, సూసైడ్ నోట్లోని వివరాలు దర్యాప్తులో నిర్ధారణ కావాల్సి ఉంది.
