⛈️ పుంజుకోనున్న నైరుతి రుతుపవనాలు – తెలంగాణకు మళ్లీ వర్ష సూచనలు.

బలహీనపడిన నైరుతి రుతుపవనాలు మరోసారి పుంజుకోనున్నాయని భారత వాతావరణ శాఖ తెలిపింది.

బంగాళాఖాతంలో ఏర్పడుతున్న వాతావరణ మార్పుల కారణంగా సముద్రపు గాలులు బలంగా వీచే అవకాశం ఉంది. దీంతో దట్టమైన మేఘాలు ఏర్పడి రానున్న 2 నుంచి 3 రోజుల్లో అల్పపీడనం ఏర్పడే అవకాశముందని అధికారులు వెల్లడించారు.

ఈ అల్పపీడనం ఒడిశా – పశ్చిమ బెంగాల్ తీరాల వైపు పయనిస్తూ తూర్పు భారతదేశంలో విస్తారంగా వర్షాలు కురిపించే అవకాశం ఉంది.

దీని ప్రభావంతో జూలై 19 వరకు తెలంగాణ రాష్ట్రంలోని ఉత్తర, పశ్చిమ జిల్లాల్లో మోస్తరు నుంచి భారీ వర్షాలు కురిసే అవకాశం ఉందని వాతావరణ శాఖ అంచనా వేసింది. ముఖ్యంగా గురువారం నుంచి వర్షాల తీవ్రత మరింత పెరిగే అవకాశం ఉందని హెచ్చరించింది.

రైతులు, ప్రజలు అప్రమత్తంగా ఉండాలని, ఉరుములు, మెరుపుల సమయంలో చెట్ల కింద నిలబడకూడదని, అవసరమైతే మాత్రమే బయటకు వెళ్లాలని అధికారులు సూచిస్తున్నారు.