🎬 ANDHARI TV DIGITAL

📰 సినీ వార్త

'ఫౌజీ' షూటింగ్‌లో బాలీవుడ్ నటుడికి విషపురుగు కాటు.. ఆసుపత్రిలో చికిత్స

 ప్రముఖ నటుడు ప్రభాస్ హీరోగా తెరకెక్కుతున్న 'ఫౌజీ' సినిమా షూటింగ్ సందర్భంగా బాలీవుడ్ నటుడు రాజేష్ శర్మకు విషపురుగు కాటేసినట్లు సినీ వర్గాల్లో సమాచారం. తొలుత దీనిని సాధారణ పురుగు కాటుగా భావించిన ఆయన, కొంతసేపటి తర్వాత తీవ్ర అస్వస్థతకు గురయ్యారు.

సుమారు ఆరు గంటల తర్వాత జ్వరం, తీవ్రమైన నొప్పి, శరీరంలో అసౌకర్యం వంటి లక్షణాలు కనిపించడంతో వెంటనే వైద్యులను సంప్రదించారు. అనంతరం హైదరాబాద్ నుంచి కోల్‌కాతాకు ప్రయాణిస్తుండగా విమానంలో శ్వాస తీసుకోవడంలో ఇబ్బందులు ఎదురైనట్లు తెలుస్తోంది.

ప్రస్తుతం కోల్‌కాతాలోని ఆసుపత్రిలో వైద్యులు అత్యవసర చికిత్స అందిస్తున్నట్లు సమాచారం. రాజేష్ శర్మ ఆరోగ్య పరిస్థితిపై వైద్యులు నిశితంగా పర్యవేక్షిస్తున్నట్లు సినీ వర్గాలు వెల్లడించాయి.

సినిమా షూటింగ్‌లలో భద్రతా చర్యలను మరింత కట్టుదిట్టం చేయాల్సిన అవసరాన్ని ఈ ఘటన మరోసారి గుర్తు చేస్తోంది.