జయశంకర్ భూపాలపల్లి జిల్లాలో విషాదం.. MVI వెంకన్న మృతి
భూపాలపల్లి | అందరి టీవీ డిజిటల్ న్యూస్
జయశంకర్ భూపాలపల్లి జిల్లాలో విధి నిర్వహణలో ఉన్న మోటార్ వెహికిల్ ఇన్స్పెక్టర్ (MVI) వెంకన్న రోడ్డు ప్రమాదంలో మృతి చెందడం తీవ్ర విషాదాన్ని నింపింది. సోమవారం ఉదయం జరిగిన ఈ ఘటన రవాణా శాఖ అధికారులను, సహచర ఉద్యోగులను దిగ్భ్రాంతికి గురిచేసింది.
అధికారుల వివరాల ప్రకారం, తాడిచర్ల కోల్ మైన్ నుంచి భూపాలపల్లి థర్మల్ పవర్ స్టేషన్కు బొగ్గును తరలిస్తున్న బొగ్గు లారీ ప్రమాదానికి కారణమైనట్లు గుర్తించారు. విధి నిర్వహణలో భాగంగా తనిఖీలు నిర్వహిస్తున్న సమయంలో ఈ ప్రమాదం జరిగినట్లు తెలుస్తోంది.
ప్రమాదం జరిగిన వెంటనే స్థానికులు, అధికారులు స్పందించి వెంకన్నను ఆసుపత్రికి తరలించే ప్రయత్నం చేసినప్పటికీ ఫలితం లేకపోయింది. చికిత్స పొందుతూ ఆయన మృతి చెందినట్లు సమాచారం.
ఉమ్మడి వరంగల్ జిల్లా చేర్యాల ప్రాంతానికి చెందిన వెంకన్న ఎంతో కష్టపడి ఉన్నత స్థాయికి చేరుకున్న అధికారి. విద్యుత్ (మెకానికల్) ఇంజినీరింగ్లో విద్యాభ్యాసం పూర్తి చేసిన ఆయన 2003లో అసిస్టెంట్ ఇంజనీర్గా ఉద్యోగ జీవితాన్ని ప్రారంభించారు. అనంతరం కేటీపీఎస్లో సేవలందిస్తూ అసిస్టెంట్ డివిజనల్ ఇంజనీర్ హోదాకు ఎదిగారు.
చదువుపై ఆసక్తితో పబ్లిక్ సర్వీస్ కమిషన్ పరీక్షల్లో విజయం సాధించి రవాణా శాఖలో అధికారిగా చేరారు. క్రమశిక్షణ, నిజాయితీ, విధి నిర్వహణలో అంకితభావానికి మారుపేరుగా నిలిచిన వెంకన్న సేవలను సహచరులు గుర్తు చేసుకుంటూ కన్నీటి పర్యంతమవుతున్నారు.
వెంకన్నకు భార్యతో పాటు ఇద్దరు మైనర్ పిల్లలు ఉన్నారు. కుటుంబానికి ఆయనే ప్రధాన ఆధారం కావడంతో ఆయన మృతి కుటుంబాన్ని తీవ్ర విషాదంలోకి నెట్టింది.
ఈ ఘటనపై తెలంగాణ ముఖ్యమంత్రి రేవంత్ రెడ్డి తీవ్ర దిగ్భ్రాంతి వ్యక్తం చేశారు. వెంకన్న కుటుంబ సభ్యులకు ప్రగాఢ సానుభూతి తెలియజేస్తూ, ప్రభుత్వం తరఫున అన్ని విధాలుగా ఆదుకుంటామని హామీ ఇచ్చారు. ప్రమాద ఘటనపై సమగ్ర విచారణ జరిపి నివేదిక సమర్పించాలని సంబంధిత అధికారులను ఆదేశించారు.
విధి నిర్వహణలో ప్రాణాలు కోల్పోయిన వెంకన్నకు న్యాయం జరిగేలా చర్యలు తీసుకోవాలని కుటుంబ సభ్యులు, ఉద్యోగ సంఘాలు, ప్రజాప్రతినిధులు ప్రభుత్వాన్ని కోరుతున్నారు.
