అందరి టీవీ డిజిటల్ న్యూస్: హనుమకొండ, అంబేద్కర్ జంక్షన్: కాంగ్రెస్ ప్రభుత్వ వైఫల్యాలను ఎండగడుతూ సబ్బండ వర్గాలు శాంతియుతంగా నిరసనలు తెలుపుతుంటే వాటిని సహించలేని రేవంత్ సర్కార్ అక్రమ నిర్బంధాలు, అరెస్టులకు పాల్పడుతోందని మాజీ ప్రభుత్వ చీఫ్ విప్ దాస్యం వినయ్ భాస్కర్ ఆరోపించారు. కాంగ్రెస్ ప్రభుత్వ పాలనలో ప్రజలకు ఇచ్చిన హామీలు అమలు కాకపోవడాన్ని నిరసిస్తూ హనుమకొండ అంబేద్కర్ జంక్షన్లో నిర్వహించిన కార్యక్రమంలో ఆయన పాల్గొన్నారు.కాంగ్రెస్ ప్రభుత్వం అధికారంలోకి వచ్చి 1000 రోజులు పూర్తవుతున్న సందర్భంగా, ఎన్నికల సమయంలో ప్రజలకు ఇచ్చిన 6 గ్యారంటీలు, 420 హామీల అమలుపై ప్రభుత్వం స్పష్టత ఇవ్వాలని డిమాండ్ చేశారు. ఈ సందర్భంగా బాబాసాహెబ్ డాక్టర్ బీఆర్ అంబేద్కర్ విగ్రహానికి వినతిపత్రం సమర్పించారు.
మహిళా ఎమ్మెల్యేలపై జరిగిన వ్యవహారాన్ని నిరసిస్తూ రాస్తారోకో నిర్వహించిన నాయకులు, కార్యకర్తలు ప్రభుత్వ తీరుపై ఆగ్రహం వ్యక్తం చేశారు. ప్రజాస్వామ్యబద్ధంగా తమ నిరసనను తెలియజేస్తున్న వారిపై పోలీసులు వ్యవహరిస్తున్న తీరు సరికాదని విమర్శించారు.
దాస్యం వినయ్ భాస్కర్ మాట్లాడుతూ, కాంగ్రెస్ పార్టీ ఎన్నికల సమయంలో 100 రోజుల్లో అమలు చేస్తామని చెప్పిన హామీలు 1000 రోజులు దాటుతున్నా పూర్తిస్థాయిలో అమలు కాలేదని ఆరోపించారు. ప్రజలకు ఇచ్చిన హామీలను విస్మరిస్తున్న ప్రభుత్వాన్ని ప్రశ్నించేందుకు బీఆర్ఎస్ పార్టీ ప్రజల పక్షాన పోరుబాట పట్టిందని పేర్కొన్నారు.
బీఆర్ఎస్ వర్కింగ్ ప్రెసిడెంట్ కేటీఆర్ పిలుపు మేరకు కాంగ్రెస్ ప్రభుత్వ వైఫల్యాలను ప్రజల్లోకి తీసుకెళ్లేందుకు నిరసన కార్యక్రమాలు నిర్వహిస్తున్నామని తెలిపారు. విద్యార్థుల నుంచి వృద్ధుల వరకు వివిధ వర్గాల ప్రజలు ప్రభుత్వ పాలనపై అసంతృప్తితో ఉన్నారని ఆయన ఆరోపించారు.
విద్యార్థులకు ఫీజు రీయింబర్స్మెంట్, యువతకు ఉద్యోగావకాశాలు, కార్మికులకు ఉపాధి అవకాశాలు, వృద్ధులు మరియు వికలాంగులకు సంబంధించిన పెన్షన్ల అమలులో ప్రభుత్వం విఫలమైందని విమర్శించారు. తెలంగాణ రాష్ట్ర అభివృద్ధిని వేగంగా ముందుకు తీసుకెళ్లాల్సిన సమయంలో ప్రభుత్వం ప్రజా సమస్యలను పరిష్కరించడంలో విఫలమవుతోందని ఆరోపించారు.
అసెంబ్లీ ఆవరణలో మహిళా ఎమ్మెల్యేలతో పోలీసులు వ్యవహరించిన తీరుపై కూడా దాస్యం వినయ్ భాస్కర్ తీవ్ర అభ్యంతరం వ్యక్తం చేశారు. మాజీ మంత్రి సబితా ఇంద్రారెడ్డి, ఎమ్మెల్యే సునీత లక్ష్మారెడ్డి తదితర మహిళా నాయకుల పట్ల జరిగిన వ్యవహారం సమాజానికి తలవంపులు తెచ్చేదిగా ఉందని పేర్కొన్నారు.
ఈ సందర్భంగా అసెంబ్లీలో జరిగిన రాజకీయ చర్చలను ప్రస్తావిస్తూ సీనియర్ నాయకుడు కడియం శ్రీహరి చేసిన వ్యాఖ్యలపై కూడా విమర్శలు చేశారు. దళితుల సంక్షేమం, రాజకీయ ప్రాధాన్యత అంశాలపై కాంగ్రెస్ నాయకులు చేస్తున్న వ్యాఖ్యలను ప్రశ్నించారు.
దళిత నాయకులకు రాజకీయంగా ప్రాధాన్యత కల్పించడంలో కేసీఆర్ పాత్ర ఉందని, దళితుల ఆర్థిక అభివృద్ధి కోసం గత బీఆర్ఎస్ ప్రభుత్వం తీసుకొచ్చిన దళిత బంధు పథకం గురించి ప్రస్తావించారు. కాంగ్రెస్ పార్టీ ఎన్నికల మేనిఫెస్టోలో చేసిన హామీల అమలుపై ప్రభుత్వం సమాధానం చెప్పాలని డిమాండ్ చేశారు.
ప్రజలకు ఇచ్చిన హామీలను అమలు చేసే వరకు, ప్రజా సమస్యలపై బీఆర్ఎస్ పార్టీ తన పోరాటాన్ని కొనసాగిస్తుందని దాస్యం వినయ్ భాస్కర్ స్పష్టం చేశారు. కాంగ్రెస్ ప్రభుత్వ వైఫల్యాలను ప్రజల్లోకి తీసుకెళ్లి, ప్రజల తరఫున నిరంతరం ప్రశ్నిస్తామని తెలిపారు.
